ଈଶ୍ୱର

ପ୍ରେମକୁ ଆଲିଙ୍ଗି ନେବା ପରେ

ଘୃଣା ବୋଲି ଆଉ କ’ଣ ଥାଏ ଯେ ?

ଦେହକୁ ଦାହ୍ୟ ପଦାର୍ଥ କରି

ଖାଲି ଯାହା ଜାଳିବାକୁ ହେବ

ମୁଠାଏ ଅହଙ୍କାରକୁ ,

ସ୍ରୋତର ଅନୁକୂଳରେ

ଏବେ ନଈ ନାଉରୀଆ ଆଉ ଡଙ୍ଗା,

ପବନ ବି ମୋର ଦିଗ ବି ମୋର …..

ଭଉଁରୀ ଠୁ ଅନେକ ଦୂରରେ ମୁଁ ,

ହେଇତ ଝାପ୍ସା ଝାପ୍ସା

ଦିଶିଲାଣି କୂଳ,

ଏଇବୋଧେ ଭେଟହେବେ ଈଶ୍ୱର !

ବାହୁଟେକି ଅନେଇଲି ମହାଶୂନ୍ୟକୁ

କୁଆଁତାରା ପରି 

ଦିଗ୍ ଦିଗ୍ ଜଳୁଥିବା ମେଘଖଣ୍ଡେ

ଆବୋରି ନେଉଥିଲା ମୋ ଇନ୍ଦ୍ରିୟମାନଙ୍କୁ ।

ଅପସରି ଯାଉଥିଲେ

ମୋହାଚ୍ଛନ୍ନ ଆକାଶରୁ

ଈର୍ଷାର ସମୁଦ୍ରେ ତାରକାପୁଞ୍ଜ ,

ମୁଁ ମୋ ସତ୍ତା ହରେଇ

ପହଞ୍ଚୁଥିଲି ନୂଆ ଠିକଣାରେ

ଯେଉଁଠି ଥିଲେ ଈଶ୍ୱର ।

ନାମ – ପ୍ରଶାନ୍ତ କୁମାର ପଧାନ

ଗ୍ରାମ – ବୁରୋମୁଣ୍ଡା

ପୋ . ଅ – ଗାଇସିଲାଟ

ଜିଲ୍ଲା – ବରଗଡ଼

ପିନ୍ – 768037

ଓଡ଼ିଶା

ମୋ – 9937745497